Rreth Festival Academy:
Festival Academy është një platformë arti dhe kulture dedikuar ndërlidhjes së trashëgimisë kulturore dhe zhanreve klasike me artin modern dhe inovacionin. Në promovimin e arteve dhe kulturës, një element thelbësor i platformës përfshin angazhimin e të rinjve dhe qasjen ndaj brezit të rinj të talenteve dhe performuesve.
Organizata ka zhvilluar një program me një varietet formatesh, duke përfshirë punëtori (workshops), gara, forume, evente performuese, projekte arti, diskutime autorësh, leksione të hapura, masterklasa dhe këmbime. Këto aktivitete prekin një gamë të gjerë zhanresh dhe fushash, si artet performuese dhe vizive, shkrimi dhe gazetaria kulturore, inovacioni artistik dhe teknologjik, arkitektura dhe dizajni urban, arkeologjia dhe trashëgimia, industria krijuese dhe sipërmarrja, të folurit publik, lidershipi kulturor dhe diplomacia kulturore.
Festival Academy ka sjellë deri më sot në Shqipëri evente të tilla si Festivali Kulturor Shqiëpri-Izrael, Ditët e Kulturës Hungareze në Shqipëri “Hungarissimo”, “Francontemporan”, si dhe masterklasa dhe konferenca educative me disa nga lektorët më në zë në Europë në fushën e artit, kulturës, edukimit dhe inovacionit.
Nëpërmjet një rrjeti të gjerë kontaktesh dhe bashkëpunimesh me partnerë në Gjermani, Izrael, Hungari, Shtetet e Bashkuara, Kosovë, si dhe në vende të Ballkanit, kemi garantuar cilësi të lartë në mbarëvajtjen e aktiviteve të larmishme për publikun e gjerë shqiptar dhe ndërkombëtar.